Сядзіба М.К. Агінскага – прытулак творчасці, натхнення, прыгажосці. Сама атмасфера, прырода, гісторыя спрыяе стварэнню вершаў, карцін. Здаецца, што паветра насычана атмасферай тых “Паўночных Афін”, калі гэтае месца было цэнтрам культуры ўсяго краю. І чароўны ўплыў незвычайнага месца адчулі на сабе юныя госці Міхала Клеафаса.

2-га чэрвеня ў парку сядзібы адбыўся майстар-клас па малюнку пад назвай “Агінскі вачыма дзяцей”. Шасцёра дзяўчынак і адзін хлопчык спрабавалі свае сілы ў авалоданні чароўным светам фарбаў, майстэрствам перадаваць убачанае на паперы. Дапамагаў ім ў гэтай складанай справе мастак сядзібы – Максім Варанцоў. Пад яго ўмелым кіраўніцтвам юныя мастакі стварылі свае працы, якія абавязкова застануцца ў музеі, і хто ведае, магчыма– гэта толькі першая спроба, якая натхніць кагосьці з іх у будучым стаць сапраўдным мастаком. Пасля таго, як усё было намалявана, удзельнікаў мерапрыемства чакалі салодкія сюрпрызы ў аранжарэі кампазітара, а мастак сядзібы ўручыў сваім вучням на памяць дыпломы і падарункі.

по материалам сайта: www.shliah.by